Arolwg cynhyrchwyr 2008:

Saesneg

Diolch yn fawr i’r cynhyrchwyr a gwblhaodd yr Arolwg Cynhyrchwyr Organig yn yr hydref. Gellir lawrlwytho’r adroddiad llawn isod neu trwy ofyn i Ganolfan Organig Cymru amdano. Mae’n adeiladu ar arolwg y llynedd, ac mae’n cynnwys pob agwedd o gynhyrchu a marchnata organig yn ogystal ag agweddau tuag at drawsnewid organig.

Lawrlwythwch Adroddiad cyhyrchu a marchnata organig Cymru 2008 (yn Saesneg, PDF, 837kb) neu ddarllen y crynodeb isod.

Sector organig sy’n tyfu ac yn parhau i fod yn gystadleuol

Pryderon cynhyrchwyr - premiymau, prisiau bwydydd a thrawsnewidwyr newydd

Y pryder mwyaf i ffermwyr organig Cymru yw’r gostyngiad yn y premiwm organig mewn llawer o sectorau. Mae ffermwyr bîff a defaid yn cael eu talu oddeutu £3.00/kg pwysau marw, sydd yn cael ei weld yn rhy isel gan lawer, yn arbennig felly gan bod prisiau confensiynol yn debyg iawn, a phris bwydydd organig yn parhau i fod tua £360-£400/tunnell fetrig. Mae tystiolaeth bod yr argyfwng ariannol wedi lleihau’r gofyn am doriadau cig drutach, sy’n effeithio ar y gofyn am y stoc gorau. Roedd ffermwyr defaid yn arbennig wedi datgan pryderon fod y farchnad ŵyn wedi’i gorgyflenwi, gydag ofnau ynghylch y nifer fawr o ddefaid sydd yn awr mewn trawsnewid. Mae cynhyrchwyr llaeth organig yn gyffredinol yn derbyn premium organig arwyddocaol am eu llaeth, er bod llawer yn dangos eu bod angen mwy o elw dros brisiau confensiynol er mwyn talu am fwydydd organig drud. Mae cynhyrchwyr wyau yn amrywio’n fawr mewn maint, gyda llawer o gynhyrchwyr bychain yn canfod fod prisiau bwydydd yn afresymol, tra bod mentrau dofednod newydd yn tueddu i fod ar raddfa fwy.

Rhesymau am optimistiaeth

Mae prisiau ŵyn organig yn sylweddol uwch na’r llynedd, gan bod disgwyl i chyflenwadau’r gwanwyn fod yn fyr, ac er bod prisiau bîff organig ychydig yn is na’r llynedd, mae prisiau confensiynol bron yr un fath ac maent yn darparu byffer i gyflenwad organig. Mae’r data cost cynhyrchu diweddaraf yn cadarnhau fod y sector cig coch organig wedi perfformio’n arbennig o dda yn 2007/08 a bydd yn parhau’n gystadleuol hyd yn oed ar brisiau confensiynol. Mae prisiau organig wedi bod yn sefydlog am nifer o flynyddoedd, a bydd nifer o ffactorau sy’n cefnogi prisiau confensiynol uchel yn sicrhau fod prisiau organig yn aros yn dda.

Sectorau da byw yn paratoi ar gyfer ychwanegu stoc trawsnewid

Arhosodd amcangyfrif nifer da byw organig llawn yn debyg yn 2008 o’i gymharu â 2007, er bod nifer arwyddocaol yn awr yn cael eu trawsnewid - fodd bynnag, nid oes disgwyl i’r rhain ddod ar y farchnad mewn niferoedd arwyddocaol cyn 2010/2011 a thu hwnt. Yn y sector bîff, gwerthwyd oddeutu 25% o wartheg stor a 6% o wartheg wedi’u gorffen i’r farchnad gonfensiynol. Yn y sector defaid, collwyd 25% o ŵyn wedi’u gorffen a 60% o ŵyn stôr i farchnadoedd confensiynol, yn rhannol oherwydd prisiau confensiynol deniadol.

Datblygu’r farchnad

Fe fydd y canlyniadau hyn yn galluogi Canolfan Organig Cymru, Llywodraeth y Cynulliad a chyrff eraill yn y diwydiant, yn cynnwys Hybu Cig Cymru, i ddatblygu strategaethau effeithiol i sicrhau bod y sector organig yng Nghymru yn parhau i ehangu. Er gwaethaf pryderon cynhyrchwyr mae’r sector yn parhau i fod yn gystadleuol yn ariannol ac mae ganddo amser i addasu i gynhyrchwyr organig ychwanegol.

Yn ôl i'r brig