Bwletin

Marchnad Organig Cymru

Rhif 59,  10 Rhagfyr 2007

Mynd yn syth at yr adran:

Marchnad Organig Cymru     Llaeth   Grawnfwydydd   Cig a da byw   ffrwythau a llysiau  Newyddion    Y farchnad    Gwylio'r prisiau adwerthol  Adborth

Marchnad Organig - Cymru

Yn ôl i'r brig

Gwefan ystadegau organig newydd Mae Canolfan Organig Cymru wedi diweddaru tudalen Ystadegau Organig eu gwefan. Dilynwch y ddolen www.organic.aber.ac.uk/statistics

Newidiadau i Gynllun Ffermio Organig

Cymru Mae Llywodraeth Cynulliad Cymru wedi cyhoeddi newidiadau i Gynllun Ffermio Organig Cymru er mwyn symud ffermio organig yn ei flaen yng Nghymru. Amlinellir newidiadau i’r cynllun ar y wefan yn fan hyn.

    Pan fydd y Cynllun Ffermio Organig yn agored ar gyfer ceisiadau, bydd Canolfan Organig Cymru yn cyhoeddi gwybodaeth i ffermwyr gan esbonio sut y bydd cynllun newydd yn gweithio, yn fan hyn. 

Oscars bwyd a diod Mae dros 40 o gwmnïau bwyd a diod yng Nghymru wedi derbyn acolâd uchaf y diwydiant – Gwobrau Gwir Flas Bwyd a Dio 2007-2008.

Enillwyr y Gwobrau Organig:

Cynnyrch Cig (Oen): Welsh Farm Organics, Y Drenewydd.

Cynnyrch Llaeth (Cynhyrchydd Bach): Gwneuthurwyr Caws Llanboidy, Hendy-gwyn).

Gellir gweld y rhestr lawn yn fan hyn

Sioe Gwir Flas Cymru

Cyflwynwyd bwyd o Gymru i siopwyr a oedd wrthi’n stocio ar gyfer y Nadolig drwy raglen deledu ar sianel siopa’r DU, PVC. Dyma ddathlu pen blwydd cyntaf ei Sioe Gwir Flas Cymru. Bu saith cwmni, Welsh Farm Organics, Clams Cakes, Castle Choclates, Siwgr a Sbeis, Cawsiau o Gymru, Harvies Pies a’r Patchwolrk Traditional Food Company, yn ymddangos ar y sioe fyw. Mwy o wybodaeth

Beirniaid iau wrth eu boddau â Daioni

Mae Trioni – a ddyfeisiodd y diodydd llaeth â blas i blant – wedi ennill gwobr ragoriaeth wedi’i beirniadu gan banel o blant 5 i 12 oed. Enwebwyd Trioni Cyf. sy’n cynhyrchu nwyddau llaeth organig â blas Daioni fel y ddiod orau i blant yn y Gwobrau Rhagoriaeth mewn Bwyd a drefnir gan gylchgrawn The Caterer and Hotelkeeper. Mae’r gwobrau blynyddol yn cydnabod rhagoriaeth mewn cynnyrch sydd wedi’i anelu at y diwydiant gwasanaeth bwyd ac fe’i beirniedir gan brif gogyddion a beirniaid bwyd. Mae categori’r plant, a noddir gan 3663, hefyd yn cael ei feirniadu gan banel iau a fu’n frwd ynglŷn â Daioni â blas siocled, gan ddweud fod blas hyfryd arni, a’i bod yn drwchus ac yn llawn swigod”. Mwy o wybodaeth

Cynllun Grant Prosesu a Marchnata

Mae’r Cynllun o dan y Cynllun Datblygu newydd bellach yn agored i dderbyn ceisiadau. Cysylltwch â Sue Fowler ar gyfer nodiadau arweiniol.

Cynllun Effeithiolrwydd y Gadwyn Gyflenwi

Mae Canolfan Organig Cymru’n gweithio â busnesau organig i gyflwyno cais i’r gronfa hon i gynnal gwaith ar y gadwyn gyflenwi organig yng Nghymru. Cynhaliwyd cyfarfod â rhai busnesau a chynhyrchwyr organig ac mae Canolfan Organig Cymru bellach yn tynnu at ei gilydd syniadau a dewisiadau. Bwriedir cynnal cyfarfod arall i fynd â’r cynnig yn ei flaen ar gyfer mis Ionawr pan fydd y cwmpas wedi’i ddatblygu ac wedi dod yn gliriach. Mae’r cynllun hwn yn agored i gyrff a busnesau hyd uchafswm o gymorth 50%: Bydd Canolfan Organig Cymru yn gymwys i dderbyn cymorth 100%. Mwy o wybodaeth.

Gŵyl Fwyd Cegaid Cymru

Mae gŵyl fwyd a diod leol newydd o Bowys â’r siroedd cyffiniol yn cael ei threfnu gan Glasu ar gyfer 26 a 27 Ebrill 2008. Bydd y digwyddiad, Cegaid Canolbarth Cymru, yn cael ei gynnal ochr yn ochr â sioe wlân a ffibrau naturiol Wonderwool Wales ym maes y Sioe yn Llanelwedd. Bydd atyniadau’n cynnwys dros 50 o stondinau cynhyrchwyr crefft, selebs ac arddangosiadau gan gogyddion lleol, Ready, Steady, Powys, cystadleuaeth goginio’r Clybiau Ffermwyr Ifainc a gweithgareddau bwyd i blant. Gwyliwch y gofod hwn am fwy o wybodaeth! Er mai’r dyddiad cau swyddogol am geisiadau stondinau yw 7 Rhagfyr, mae amser o hyd i fwy o gynhyrchwyr organig Canolbarth Cymru i wneud cais. Lawrlwythwch ffurflenni cais yn fan hyn neu cysylltwch â Glasu ar 01982 552224 neu glasu@powys.org.uk.

Organig ar y fwydlen yn ysgolion Sir Gâr

Ddydd Iau 6 Rhagfyr gyda chefnogaeth lawn Cyngor Sir Gâr, roedd pryd o fwyd organig ar fwydlen holl ysgolion cynradd y sir. Y pryd hwn oedd y pumed mewn cyfres o brydau bwyd ysgol arddangos sy’n anelu at helpu sefydlu cadwyni cyflenwi lleol trwy gynnwys staff y cyngor, cynghorwyr, llywodraethwyr, rhieni, ffermwyr a thyfwyr bwyd. Mae’r digwyddiadau hyn a drefnir fel rhan o brosiect RAFAEL yr UE sy’n hyrwyddo bwyd dilys yn ardaloedd arfordirol yr Iwerydd yn Ewrop, hefyd yn arddangos cyfleoedd ac anawsterau wrth gael hyd i ffynonellau cynnyrch organig lleol ar gyfer prydau o fwyd ysgol. Ymunodd Canolfan Organig Cymru amser cinio yn ysgol gynradd Peniel yn Sir Gâr. Cafodd y plant, y cogyddion a’r athrawon flas mawr ar bastai’r bugail a moron organig, y cogyddion. Gofynnodd y plant lawer iawn o gwestiynau am fwyd organig a rhoddwyd taflen i bob un gyda mwy o wybodaeth am ffermio organig.

    Gall unrhyw un sydd â diddordeb ym mhrosiect RAFAEL neu am brydau bwyd ysgol arddangos gysylltu â Jane Powell ar 01970 621530 neu edrych ar wefan Canolfan Organig Cymru yma neu wefan RAFAEL ar www.rafael-eu.com.

Marchnad Organig - Llaeth

Yn ôl i'r brig

Gwerthiant llaeth organig yn hybu twf y farchnad laeth

Yn ôl data A C Nielsen Scantrack, mae’r sector llaeth organig wedi codi 11.5% o ran cyfaint yn ystod y flwyddyn hyd at 6 Hydref. Mae Yeo Valley, un o brif frandiau’r farchnad laeth organig, wedi sylwi:

• bod defnyddwyr bellach yn yfed mwy na 200m litr o laeth organig y flwyddyn

• bod llaeth organig bellach yn werth £150m, 16% yn uwch na’r 12 mis blaenorol

• bod cyfaint ei frand llaeth organig ei hun yn tyfu 147% o flwyddyn i flwyddyn yn ôl data diweddaraf y cwmni

    Yn ôl Ben Cull, Cyfarwyddwr Marchnata Yeo Valley: “Mae manteision moesegol ac amgylcheddol cryf o blaid llaeth organig sy’n apelio at nifer cynyddol o ddefnyddwyr, ond bob tro y ceir ymchwil newydd sy’n dangos budd maethlon cynnyrch organig, bydd y gwerthiant yn llamu ymlaen ymhellach.” Organic Inform

Calon Wen yn cwrdd â defnyddwyr llaeth organig

Bu Calon Wen yn trefnu digwyddiad Dewch i Gwrdd â’n Ffermwyr yn Llundain. Bu tri ffermwr yn ymweld â 12 cangen o Waitrose yn Llundain rhwng 26 a 27 Tachwedd 2007. Mae gan Calon Wen ddiddordeb mewn cwrdd â defnyddwyr ac mewn ateb unrhyw gwestiynau sydd ganddynt. Buont yn arddangos eu Eco–pak newydd gan gynnig pac am ddim wrth brynu jwg yr Eco-pak. Yn ôl Roger Kerr: “cafodd y digwyddiad groeso mawr a chawson ni adborth arbennig o dda .” Mae Calon Wen yn edrych i gynnal y digwyddiad mewn lleoliadau eraill. Yn sicr, mae’r farchnad i laeth organig yno. Sonia Roger Kerr fod Ffederasiwn y Grwpiau Llaeth wedi sicrhau grant MDC i ymdrin â marchnata generig. Yn ôl Roger, dyma’r tro cyntaf i’r grwpiau ffermwyr farchnata ar y cyd.

Mae porthiant yn parhau fel un o’r prif broblemau i gynhyrchwyr llaeth organig. Mae Roger Kerr yn hapus fod cwmnïau bwyd bellach yn fodlon edrych ar gydymffurfio â deddfwriaeth 100% porthiant organig. Ymddengys mai protein yw’r brif broblem. Yn ôl Roger Kerr, “mae pris llaeth wedi codi, ond gyda chostau uchel y porthiant, nid yw’r ffermwyr yn elwach o hyd.” Mae yma ffermwyr sy’n dal i fod wrthi yn troi’n organig er bod rhai wedi oedi troi o ganlyniad i brisiau bwyd.

Gwybodaeth am brisiau organig

Dilynwch y ddolen am fwy o wybodaeth o Dairy Farmers of Britain yn fan hyn.

Pecynnau newydd i’r teulu o gaws Yeo Valley organig

Mae The Cheese Company (Milk Link) ac Yeo Valley wedi lansio amrywiaeth newydd o becynnau cheddar organig newydd maint teuluol yn hufenfa The Cheese Company yn Nyffryn Taw ac fe’i disgrifiwyd fel cam mawr ymlaen wrth ehangu a datblygu brand caws organig Yeo Valley. Farmers Guardian

Trioni yn adrodd

Mae Trioni yn lansio gwefan newydd ar 9 Rhagfyr. Bydd y wefan yn dangos yr holl wybodaeth ddiweddaraf ynglŷn â lle i brynu eu diod llaeth â blas a’r holl ddatblygiadau diweddaraf a’r gwobrau a enillwyd gan Trioni. Mae Trioni wedi arwyddo nawdd gan Academi Chelsea. Y cytundeb yw i gyflenwi llaeth â blas am 2 dymor. Ar ben hynny, mae tîm Bolton Wanderers wedi dangos diddordeb mewn prynu diodydd llaeth blas gan Trioni ac maent bellach ar gael ym mhob Coop yng Nghymru. Maent yn gobeithio gwerthu’r cynnyrch mewn siopau yn Lloegr yn ogystal. Gyda’r cynnydd yn y galw, mae Trioni yn edrych ar gynhyrchu mwy o laeth y flwyddyn nesaf.

Marchnad Organig - Grawnfwydydd

Yn ôl i'r brig

Mae Norton Organic Grains yn adrodd bod y farchnad wedi sefydlogi. Bu tywydd yr hydref yn braf ac mae llawer iawn o ffermwyr wedi cadw eu hanifeiliaid allan. O ganlyniad, mae’r fasnach newydd yn araf deg. Mae costau porthiant yn dal i fod yn broblem i lawer iawn o ffermwyr. Mae prisiau allbwn manwerthu wedi codi ond dim yn ddigon uchel i adlewyrchu costau porthiant cynhyrchwyr da byw. Mae stoc porthiant sy’n cael ei fewnforio wedi gwella ac o hyd ceir digon o stoc ar gyfer y misoedd sydd ar ddod. Pan ofynnwyd iddo fwrw golwg ymlaen i ddeddfwriaeth 100% porthiant organig ar ddiwedd eleni, dywed Nigel Gossett, “bydd problemau gyda molasau a gynhyrchir yn y DU a fawr ddim yn yr UE. Mewnforir y rhan fwyaf o’r UD, Yr Ariannin ac yn y blaen. Fodd bynnag, nid oes digon ar gael yn organig i gyflenwi holl brynwyr y DU.

   Y prisiau cyfredol ar gyfer y rheini sy’n prynu grawn organig yw:

Gwenith Porthiant: £310 wedi’u cyflenwi Ceirch: £280 wedi’u cyflenwi Barlys: £290-300 wedi’u cyflenwi Ffa: £335 wedi’u cyflenwi.

    Meddai Nigel Gossett: “Rwy’n gobeithio y bydd y prisiau uchel am borthiant organig yn annog cynhyrchwyr i ddechrau cynhyrchu porthiant organig. Am fwy o wybodaeth, dylech gysylltu â Norton Organic Grain ar 01787 210 899 neu edrychwch ar www.nortonorganic.co.uk.

Gwybodaeth prisiau

Am wybodaeth am brisiau mis Tachwedd 2007 gan y Soil Association cliciwch yma

Marchnad Organig - Cig a da byw

Yn ôl i'r brig

Fferm Organig y Rug yn adrodd

Mae’r galw am gig organig yn fywiog, yn enwedig yn Llundain, yn ôl John Edwards o fferm y Rug. Dywed fod y Rug yn ceisio drwy’r adeg i nabod cyfleoedd yn y farchnad gan ychwanegu: “Rydym yn canolbwyntio’n bennaf ar gyfanwerthwyr. Mae ‘na gyfle anferthol i werthu cig oen Cymreig a chig oen y morfa. Mae llawer iawn o brynwyr, megis bwytai a delîs, wedi gofyn i ni gyflenwi hyn. Mae galw mawr hefyd am ein porc. Er bod prisiau porthiant wedi cael effaith negyddol ar y busnes, mae fferm y Rug yn edrych tua’r dyfodol yn gadarnhaol iawn. Mae fferm y Rug yn chwilio am gynhyrchwyr prydau parod o ansawdd da. Am fwy o wybodaeth, cysylltwch â John Edwards ar 01490 413000

Graig Farm yn adrodd

Yn ôl Nigel Elgar, Cyfarwyddwr Cynhyrchwyr Graig Farm: “Er bod y galw am gig eidion organig a’i bris wedi bod yn sefydlog dros y misoedd diwethaf, mae’r sector defaid wedi profi cryn dipyn o broblemau o ganlyniad i’r amhariad ar y cyflenwi a achoswyd gan y tywydd gwael yn yr haf a fu’n rhwystr i’r cynhyrchu, a ddilynwyd gan gyfyngiadau Clwy Traed a Genau a rwystrodd y marchnata. O ganlyniad, dros yr ychydig fisoedd diwethaf, cafwyd gorgyflenwi difrifol ar yr un pryd â’r prisiau isaf erioed yn hanesyddol am gig oen organig. O dan yr amgylchiadau gwael hyn, mae rhai proseswyr wedi achub y cyfle i geisio adennill rheolaeth lwyr dros brisio a chyflenwi trwy gyfyngu’n arw ar niferoedd wythnosol yr ŵyn sy’n dod o Grwpiau Cynhyrchwyr cenedlaethol, annibynnol. Mae’n amlwg nad yw hyn er budd unrhyw gynhyrchwr gan fygwth yr holl a gyflawnwyd gan y Grwpiau Cynhyrchwyr cenedlaethol, megis y prisiau lleiaf gwarantedig ar ôl Nadolig ac yn wir mae’n bygwth hyfywedd ariannol cyffredinol ffermio cig oen organig. “

“Mae’r sefyllfa eleni’n eithafol, a gobeithio na fydd yn cael ei ailadrodd. Fodd bynnag, mae’n dangos gyda chyflenwi a’r galw am gig oen mewn ecwilibriwm bron, y gallai anogaeth i fwy o ffermwyr defaid i droi’n organig gael effaith drychinebus ar hyfywedd ariannol cynhyrchu cig oen organig fel y mae. Wrth i aelodau Graig Producers ddangos eu hymroddiad i farchnata Grŵp annibynnol, mae ffermwyr sy’n marchnata’n uniongyrchol i broseswyr yn tanseilio nid yn unig eu dyfodol ariannol eu hunain ond dyfodol pawb arall. Ni ellir edrych ar gig organig ar sail Cymru’n unig, oherwydd, fel y dangoswyd eleni, mae cyflenwadau o gig oen organig wedi dod o wahanol rannau o’r DU lle nad yw marchnata grŵp annibynnol eto’n gryf. Mae’r tâl comisiwn bychan a godir gan Grwpiau Annibynnol, sy’n hanfodol os ydynt i gyflawni eu holl ddyletswyddau, yn ddibwys o’i gymharu â’r toriad mewn prisiau a fwriedir gan y proseswyr yn ystod y gaeaf eleni. Mae hyn yn dangos manteision diymwad a sylweddol y grwpiau i’r holl gynhyrchwyr. Fodd bynnag, mae’i heffeithiolrwydd yn cael ei wanio oni bai bod y mwyafrif o ffermwyr organig yn ymuno ag un o grwpiau annibynnol y DU. Bydd yr enillion byrdymor i rai cynhyrchwyr sy’n marchnata’n uniongyrchol i broseswyr ond yn tanseilio hyfywedd ariannol pawb yn yr hirdymor.”

Mae Waitrose am ‘orffen’ lloi llaeth gwryw Mae lloi llaeth a aned ar ffermydd sy’n cyflenwi llaeth i Waitrose i’w gorff ar gyfer cig eidion a llo yn y DU o dan gynllun newydd a gyhoeddwyd yr wythnos hon. Dywedodd Heather Jenkins, pennaeth prynu cig archfarchnadoedd Waitrose mai cam radical oedd o, ond un a oedd yn iawn o safbwynt moesegol a lles anifeiliaid. Dywedodd fod Waitrose yn teimlo y dylai pob anifail sy’n cael ei gynhyrchu gyflawni swyddogaeth ddefnyddiol yn y gadwyn fwyd – ac ni ddylent gael eu cofnodi fel isgynnyrch yn unig.

Amcan y cynnyrch newydd yw sicrhau y gall lloi sydd dros ben o grwpiau cynhyrchu llaeth safonol ac organig Waitrose gael eu magu mewn cadwyn gyflenwi lwyr integredig. Mae’r fenter yn ei babandod, ond yr amcan yn y pen draw yw y byddai’r holl loi gwryw dros ben yn cael eu tyfu ar gyfer y marchnadoedd eidion a chig llo yn y DU. Honnir y bydd hyn yn cynnig marchnad warantedig i ffermwyr llaeth am bris teg ar gyfer lloi a fegir ac a orffennir trwy gadwyn gyflenwi Waitrose. Farmers Guardian

Bwlch rhwng pris y ffermwyr a phris yr archfarchnadoedd Bu un ffermwr cig oen yn amlygu’r bwlch rhwng y pris a delir i ffermwyr am gig oen premiwm a’r pris y mae archfarchnadoedd yn ei godi ar eu cwsmeriaid. “Go brin bod ŵyn Suffolk croes U3L yn cyrraedd £40,” meddai. “Y cwbl y bydd ffermwyr yn ei gael yw £2.55 y kilo. Yna, bydd yn mynd ar y silffoedd i Tesco am £14.99 [y kilo’.” Ychwanegodd Scottish Farmer fod y data diweddaraf ar gyfer y farchnad o’r Gymdeithas Defaid Genedlaethol yn dangos mai canran y pris manwerthu cig oen sy’n mynd yn ôl i’r cynhyrchydd ar gyfartaledd, yw 36% yn unig. Scottish Farmer.

Tociwch ar fewnforion diangen: Prynwch yn lleol

Wrth siarad yng nghynhadledd flynyddol Hybu Cig Cymru, adroddodd Cadeiryddd HCC Rees Roberts fod archfarchnadoedd, wrth gynyddu mewnforion o gig oen pan fydd cyflenwad digonol o gig oen Cymreig ar gael, “yn dirwasgu prisiau Oen Cymru, dirwasgu’r galw yn y DU ac yn tanseilio’r prisiau wrth giât y fferm ymhellach, yn ogystal â rhicio milltiroedd bwyd ac allyriadau CO2 wrth wneud.”  Dywedodd Mr Roberts fod angen i fanwerthwyr lluosog weithio i wella prisiau wrth giât y fferm a dangos ymroddiad i gynhyrchwyr Cymru trwy dorri mewnforion diangen yn syth a thrwy brynu a gwerthu mwy o fwyd lleol.” Western Mail

Pris gwarantiedig am hesbyrniaid

Cafodd cynhyrchwyr cig organig yn yr Alban hwb ddoe gyda’r newyddion bod McIntosh Donald i dalu pris lleiafswm gwarantiedig am hesbyrniaid organig yn y gwanwyn y flwyddyn nesaf. Yr amcan yw helpu manwerthwyr i osgoi mewnforio cig oen yn ystod bylchau tymhorol trwy ymestyn y tymor marchnata ar gyfer cig oen cartref. The Herald

Prisiau Da Byw Cyfredol y DU

Mae’r farchnad ŵyn gorffenedig wedi cael ei tharo’n wael ers yr haf. Bu Traed a Genau’n gyfrifol am ddirwasgu’r farchnad gonfensiynol oherwydd diffyg allforion, a golygai’r haf gwael fod ŵyn yn gorffen yn ddiweddarach – yr un pryd â’r cyfnod pryd y ceir gormodedd. Mae hyn wedi cael effaith yn ei dro ar y pris organig. Ar hyn o bryd mae’n rhaid i gynhyrchwyr cig oen aros am slot nad yw bob amser yn digwydd, sy’n golygu bod yr ŵyn weithiau heb fod yn gyfateb i faint eu manyldeb a’r cosbau arferol cysylltiedig. Prisiau am ŵyn gorffenedig yn ystod yr wythnos yn dechrau 12/11/07 oedd – Dunbia, Cymru £2.65, St Merryn Meats, Cymru £2.45 a Welsh Country £2.20 y kilo ar y bachyn. Ychydig iawn o gynhyrchwyr sy’n gallu gwrthod y prisiau hyn ar hyn o bryd ond mae angen monitro prisiau i gael trosolwg gwell o ddatblygiad y prisiau.

    Mae prisiau am ŵyn stôr a stoc magu’n well. Mae gwartheg stôr wedi aros yn sefydlog ar tua £1.40 - £1.60 a gwartheg gorffenedig am tua £3 - £3.10.

   Ceir mwy o wybodaeth am brisiau da byw ar wefan y Soil Association yn fan hyn.

Arwerthiannau Da Byw Organig

Cynhelir arwerthiannau organig nesaf McCartney’s yn y gwanwyn. Galwch 01874 622386 am fanylion.

Mae arwerthiant organig nesaf Livestock Sales y Trallwng yn ngwanwyn 2008. Galwch 01938 553438 am fanylion.

Bydd Canolfan Da Byw Caerfyrddin yn cynnal arwerthiannau organig rheolaidd. Am fanylion, galwch 01267 236268 neu Huw Evans ar 07976 328177 neu e-bostiwch carmarthen@auctionmarts.com. 

Marchnad Organig - Ffrwythau a llysiau

Yn ôl i'r brig

Prisiau Ffrwythau a Llysiau yn codi 23%

Yn ôl adroddiad gan yr ymchwilydd manwerthu ESA yn y cylchgrawn The Grocer, mae pris ffrwythau a llysiau wedi saethu i’r entrychion i’w lle uchaf ers tair blynedd. Roedd fasged siopa draddodiadol o’r cynnyrch ffres bellach yn costio 23 y cant yn fwy nag y gwnaeth ym mis Gorffennaf. Daily Express (4 Rhagfyr, y tudalen blaen).

Cymhariaeth prisiau'r archfarchnadoedd

Casgliad ymchwil a gynhaliwyd gan Riverford Organic Vegetables oedd bod y ffordd y bydd archfarchnadoedd yn chwilio am ffynonellau ac yn gwerthu cynnyrch ffres yn anghynaliadwy ac yn debygol o fynd yn fwy felly wrth i effaith olew brig ddod i rym. Cyhoeddodd Riverford Organic Vegetables ei ymchwil ddydd Mercher 21 Tachwedd, gan ddangos bod cynnyrch organig archfarchnadoedd cymaint â 73% yn ddrutach na’r cynnyrch cyfatebol mewn blwch llysiau a gyflenwir yn ddi-dâl i’r stepen drws. Manylion

Organics to Go yn adrodd

Mae Organics to Go yn parhau i chwilio am gyflenwyr newydd ar gyfer eu cynlluniau blychau. Os oes gennych ffrwyth a/neu lysiau organig i’w gwerthu neu os hoffech werthu yn y dyfodol, cysylltwch â Roger Hallam ar 01558 669020 neu edrychwch ar www.organicstogo.info. Prisiau presennol (o’r fferm, 5 Rhagfyr) yw: Tatws £9-10/25kg; Blodfresych £0.80/kg Letys 60c/y pen; Maip £60c/y pen Sbigoglys £2.50/kg; Moron 45-50c/kg Pannas 70c/kg Nionod 75c/kg Betys 50c/kg Cennin £1.20/kg Brocoli £1.40/kg Afalau bwyta £1.30/kg Bresych 60c/kg Ysgewyll £1.40/kg

Am fwy o fanylion a phrisiau mewn Garddwriaeth, gweler gwefan y Soil Association yn fan hyn.

Marchnad Organig - Newyddion

Yn ôl i'r brig

Diwydiant organig yr UD yn tyfu 21% yn 2006

Bwydydd organig yw un o’r segmentau o’r farchnad sy’n tyfu’n gyflym yn y diwydiant bwyd, gyda gwerthiant yn cynyddu 20.9% yn 2006. Yn y cyfamser tyfodd cynhyrchion organig nad ydynt yn fwyd yn yr UD o $744 miliwn yn 2005 i 1938miliwn yn 2006 – twf o 26%. Mae’r categorïau’n cynnwys ychwanegion, nwyddau gofal personol, nwyddau i’r tŷ a nwyddau glanhau, bwyd i anifeiliaid anwes, blodau a chynhyrchion ffibrau megis llieiniau a dillad. Mae’r galw am gig, y categori lleiaf ar hyd o bryd, wedi cynyddu 55% y llynedd. Cynyddodd gwerthiant cynnyrch llaeth, y segment mwyaf, 25% a llysiau a ddangosodd y twf lleiaf rhwng 2005 a 2006 (11%). www.ota.com 

Y nwyddau organig nesaf i gyrraedd y stryd fawr

Bydd mis Rhagfyr yn gweld lansio amrywiaeth o gynhyrchion organig i’r ystafell ymolchi gan Next. Mae nwyddau gofal corff ‘breuddwydio’ gan Organic Surge wedi’u hardystio gan y Soil Association. The London Paper

Popty’n defnyddio bagiau diraddiol

The Village Bakery yw’r popty cyntaf yn y DU i bacio’i fara mewn bagiau sy’n hollol bioddiraddiol ac sy’n compostio. Mae’r bagiau bara’n cael eu gwneud o ffilm Materi-bi a fydd yn torri’n garbon deuocsid, dŵr a hwmws organig heb unrhyw waddodion gwenwynig. “Cam naturiol i ni yw bagiau sy’n compostio,” meddai Lindsay Williams, rheolwraig farchnata Village Bakery Melmerby. “Mae ein holl gynnyrch yn organig ac rydym yn gweithio’n galed er mwyn sicrhau bod ein holl bacio cardbord wedi’i ailgylchu ac yn ailgylchadwy. Felly, rydym wrth ein boddau bod gennym fagiau y gellir eu compostio erbyn hyn. Cam mawr ymlaen yw hwn a bydd yn cael effaith gadarnhaol ar yr amgylchedd.” www.village-bakery.com 

Yr Iseldiroedd: gwerthiant yn aildanio

Gwerthiant organig yn yr Iseldiroedd oedd 258 miliwn EUR yn ystod rhan gyntaf 2007, 15% yn uwch na’r yr un cyfnod yn y flwyddyn flaenorol. Tyfodd yr holl farchnad fwyd 8.5%, yn ôl bio-monitor Biologica. Mae cyfran organig o’r farchnad fwyd ar hyn o bryd yw 2% Bu gwerthiant gan y siopau gostyngol Aldi, Lidl a Koopoonsult yn hybu’r canlyniad gyda thwf o 40% dros y flwyddyn flaenorol. Bu’r sector arlwyo hefyd yn ehangu 21%. Tyfodd gwerthiant gan siopau organig 12% i 100 miliwn EUR. Ar y llaw arall, gostyngodd maint y tir sy’n cael eu ffermio’n organig 1.5% o 48,424 ha i 47,674 ha. Cylchlythyr Biofach

Awstralia: galw am fwy o ffermwyr llaeth organig

Mae’r galw cynyddol am gynhyrchion llaeth organig wedi taro Awstralia. O ganlyniad, mae prif gyflenwydd llaeth organig Awstralia, yr Organic Dairy Farmers Co-operative (ODF) bellach yn galw am fwy o gyflenwyr newydd. Organic Monitor

Te Darjeeling Organig yn mynd yn fwyfwy poblogaidd

Mae Darjeeling yn adnabyddus ar draws y byd am ei amrywogaethau arbennig o de. Gyda defnyddwyr y Gorllewin yn dod yn gynyddol ymwybodol o’u hiechyd. Mae cynhyrchwyr te’n arallgyfeirio fwyfwy i segmentau anhraddodiadol. Yr atyniad diweddaraf yw te organig – hynod boblogaidd ymysg pobl y gorllewin. Organic Monitor

Am fwy o fanylion gweler https://secure.tesco.com/todayattesco/pricecheck.shtml

Marchnad Organig - y Farchnad

Yn ôl i'r brig

Gweler hefyd www.soilassociation.org/organicmarketplace and www.organicfarmers.org.uk/classifieds/index.php

Ar werth

Gwellt organig, byrnau bach. Ardystiedig gan QWFC. Cyswllt Alayne Perrott 01267-290268 neu alayne@perrott3.freeserve.co.uk (Sir Gâr). [03/12/07]

Chwech oen banw torddu Cymreig, clefyd y crafu 1/2. Brid lliw traddodiadol, cig blasus. Caled iawn, Yn ddelfrydol ar gyfer tyddyn organig. Alayne Perrott ar 01267-290268 neu alayne@perrott3.freeserve.co.uk (Sir Gâr). [03/12/07]

Wyth buwch sugno (Henffordd/BB/ lim) gyda lloi wrth droed wedi’u geni ddiwedd Mehefin/ Gorffennaf i darw du Cymreig. Ffoniwch Hugh Cory 07885 637932 neu 01446 760264 (Caerdydd) [13/11/07]

Lloi organig, Aberdeen Angus, Belgian Blue, Henffordd a Limousin yn bennaf, o Fuches Friesian Prydeinig sy’n lloia drwy gydol y flwyddyn. Cysylltwch â Robert Fear 01545 570251.

Sbinychod organig Cymreig o dras ar werth drwy'r adeg. Llinach ardderchog. Yn wydn ac yn hawdd eu trin. Wedi'u geni a'u magu ar 1000 troedfedd. Baeddod ifainc hefyd ar gael.. Neil a Patricia Plume ger Llanymddyfri 01550 740670 neu farm@penrhiwuchaf.co.uk

Meheryn Meatlinc ar werth – yn glir o’r Ysfa. Yn gofnodedig o dan Gynllun Epilio’r Comisiwn Cig a Da Byw. Meheryn ar gael i’w gweld a’u gweithio o ER & JE VINES - 01989 720289 neu e.vines@burtonfarm.com  neu ewch at ein gwefan www.meatlinc.co.uk.

Porthiant anifeiliaid yn addas ar gyfer da byw organig seiliedig ar farlys a cheirch organig. Cysylltwch â: Tom neu Eva Cowcher, Llandysul, 01559 363200. 

Defaid Shetland o frîd organig – pob oed, gwryw a beinw – bob amser ar gael. Amrywiaeth eang o liwiau sy’n cynhyrchu gwlân i’w nyddu â llaw. Cig blasus at ddant cigyddion bridiau prin. Yn wyna’n hawdd, yn famau da. Llogi maharen. pcdixon@waitrose.com Ffôn: 01454 299236. (De Swydd Gaerloyw yn agos at Bont Hafren).

Yn Eisiau

Mae Eisiau Offer ar gyfer uned arddwriaethol ddwys fechan newydd ger Trefyclo. Tractor (40+hp), dannedd sbring/anhyblyg. Planiwr Accord. Rhywbeth sy’n rhydu yn y clawdd yn cael ei ystyried. Ffoniwch Mike Westrip 07896 130982. [03/12/07]

Amrywiol

Mae Graig Producers Cymru a’r Gororau wedi cynrychioli’i 280 o aelodau gan farchnata eu da byw, ers dros 10 mlynedd. Mae hefyd yn gweithredu fel rhan o Rwydwaith Cenedlaethol â Graig Producers South West and Caledonian Organics gan harneisio nerth marchnata dros 500 o aelodau sy’n ffermio’n organig. Ceir llawer iawn o fanteision i aelodaeth. Am fwy o wybodaeth, ewch i www.graigproducers.co.uk neu am fanylion i wneud cais, ffoniwch 01597 851704, neu e-bostiwch producers@graigfarm.co.uk.  [hysbyseb barhaol]

Rhoddodd Ail Gynllun Gweithredu Organig Cymru bwyslais arbennig ar y swyddogaeth bwysig a gyflawnir gan y grwpiau cynhyrchu. Mae Grŵp Strategaeth Organig a Chanolfan Organig Cymru’n cynnig eu cefnogaeth gan argymell y dylai cynhyrchwyr bob amser ystyried y budd posibl a gynigir gan grwpiau marchnata cynhyrchwyr yn enwedig wrth ymdrin ag adwerthwyr lluosog.

Hwn oedd y cylchlythyr gwybodaeth farchnata misol gan Ganolfan Organig Cymru. Llwyfan yw’r e-fwletin hwn ar gyfer rhannu gwybodaeth am dueddiadau’r farchnad a chynhyrchu rhwng busnesau organig yng Nghymru. Rydym yn gobeithio eich bod yn ei gael yn fuddiol a chroesawn unrhyw adborth, eitemau newyddion, neu hysbysebion ar gyfer y rhifyn nesaf. Gweler ôl-rifynnau yn www.organic.aber.ac.uk/markets/mibulletin

Adborth

EITEMAU NEWYDDION Anfonwch eich eitemau newyddion, adborth a hysbysebion at david.frost@adas.co.uk.

Er bod pob ymdrech yn cael ei gwneud i sicrhau cywirdeb yr wybodaeth yn y bwletin yma, ni all Canolfan Organig Cymru a’i phartneriaid dderbyn cyfrifoldeb am ganlyniadau unrhyw gamau a gymerir ar sail unrhyw un o’u cyhoeddiadau

Yn ôl i'r brig

I danysgrifio i’r bwletin hwn, dylid anfon neges at majordomo@aber.ac.uk gyda’r gair ‘subcribe list-organic-market-wales’ (heb y dyfynodau) yng nghorff y neges. Os oes gennych unrhyw broblemau, cysylltwch â Jane Powell. Gellwch hefyd danysgrifio i e-fwletin Cymru Organig sy’n ymddangos ar ddechrau pob mis yn cynnwys y newyddion organig diweddaraf yng Nghymru, y DU a thu hwnt. Gweler www.organic.aber.ac.uk/bulletin.